மார்ச் மாதத்தில்
மகளிர் தினக் கொண்டாட்டம்
மரபாகிப் போனது!
மேடைகள் பலவும்
ஊடகங்கள் நூறும்
பெண்களின் சாதனைகள் பேசும்,
கரடு முரடான, கடினமான
கடந்து வந்த கதைகள் பேசும்!
அடிப்படை உரிமையான
கல்வி கூட கிடைக்கப் பெறாத
காலத்தைத் தாண்டி விட்டோம்.
வேலைக்குப் போகும் உரிமை பெற
விடாப்பிடியாய் போராடி
வெற்றியும் பெற்றுவிட்டோம்!
கல்வி கிட்டியது,
வேலை வாய்ப்பும் வாய்த்தது.
பாதுகாப்பும், உயர் பதவிகளில்
பிரதிநிதித்துவமும்
கிட்டவில்லையே இன்றும்!
வேலைக்குப் போகும் பெண்களின்
வேலைச் சுமையை
சமாளிப்பது சவால்தான்!
அலுவலக வேலையும்
அனுதின அடுப்படி வேலையும்
இரட்டைச் சுமை!
பெண்கள் வீட்டு வேலை செய்தால்
அதற்கு பெயர் கடமை,
ஆண்கள் வீட்டு வேலை செய்தால்
அதற்கு பெயர் உதவி!
வீட்டு வேலைகள் அனைத்தையும்
வீட்டுப் பெண்களின் பெயரில்
விபரமாக சாசனம் செய்தது யாரோ?
திருமணத்திற்கு தடையாக இருந்த
வரதட்சணை கொடுமையில் இருந்து
வெளிவந்தோம் சட்ட ரீதியாக..
வந்தது புது ப்பிரச்சனை!
ஆணை விட பெண்கள்
அதிக சம்பளம் வாங்கினால்
ஆகாதாம் குடும்பத்திற்கு..
அடிபடுமாம் ஆண் செருக்கு!
பேசாதீர் இன்னும் ஒரு முறை
பெண்களுக்கு சுதந்திரம் வேண்டும் என்று!
சுதந்திரம் கொடுக்க அவள் அடிமை இல்லை..
அவளது அடிப்படை உரிமைகளுக்கு
அடுத்தவர் அனுமதி தேவையில்லை!
ஆணும் பெண்ணும் நிகரெனக் கொள்வதால், அறிவிலோங்கி இவ்வையம் தழைக்குமாம்
No comments:
Post a Comment