கரோனாவின் தாக்கம்

covid -19

ஊரடங்கு உத்தரவு

நகரங்களில் கூட

நெடு நாளைக்குப் பிறகு

பறவைகளின்

கானக் குரல்கள்

காதில் ஒலிக்கின்றன!

பறவைகள்

குழப்பத்தில்

கூவிக் கொண்டுள்ளன!

கூட்டம் கூட்டமாய்

கும்மாளமிட்டு

கொண்டிருந்த மனிதர்கள்

எங்கே என?

மரத்தில் அமர்ந்து

மாசில்லாக் காற்றின்

மர்ம ரகசியத்தை அறிய

மன்றாடுகின்றன!

மனதளவில் குழப்பமோ!

கலிகாலத்தின்

கரோனா தாக்கம் 

மனிதர்களுக்கு மட்டுமா

அல்லது

மரங்களில் வாழும்

நமக்குமா என்று?!

இறை கண்டேன்

தாய்மையில் இறை கண்டேன்
தவழும் குழந்தையின்
மழலையில் இறை கண்டேன்
தானத்தில் இறை கண்டேன்
மான‌ம் காக்கும்
மறத்தில் இறை கண்டேன்
ஆழ்ந்த அமைதியில் இறை கண்டேன்
உதவும் உத்தமரின்
உள்ளன்பில் இறை கண்டேன்
நீதி நெறி தவறாத
நேர்மையில் இறை கண்டேன்
சூர்யோதய வண்ணத்தில்
சுகந்தமான காற்றில்
மெல்லிசையில்
மலரின் மணத்தில்
கடலின் ஓசையில்
நிலவின் ஒளியில்...
நீள்கிறது வரிசை!

பின் குறிப்பென்னவெனில்
இறை கண்டேன் என்பது
இறை கண்ட
இன்பம் கண்டேன்
என்பதாகும்.

இசையும் இறையும்

இசையும் இறையும் ஒன்று!
உள்ளார்ந்து உணரும்போது
உருவாவது சொல்லில்
அடங்காத ஆர்ப்பரிக்கும்
அளவில்லா இன்பம்!

இறையை உணர
தவமும் தனிமையும் தேவை!
இசையை உணர
லயமும் லயிப்பும் தேவை!

இசையை இசைத்து
இறையை உணர்ந்தால்
இரட்டிப்பாகுமோ
இன்னும் இன்பம்!

தமிழ்

தமிழே
தணியாத தாகம்
உன் மீது எனக்கு
தித்திப்பாய் இருந்தாலும்
திகட்டவில்லை நீ எனக்கு!

தொன்மையான வரலாறோடு
தொன்று தொட்டு
திகழ்ந்து வரும் தமிழே!
தரணியாளும் தகுதியிருந்தும்
தகுதிக் குறைவுக்குள்ளானது ஏனோ?

தமிழ் பேசத் தயங்கும்
தமிழனே! உன்
தாய் மொழியாய்
தமிழ் மொழி கிடைத்ததுன்
தவப்பயன் என அறியாயோ?

மொழி,கலாச்சாரம்,பண்பாடு
மூன்றும் இணைந்தே வருவது.
மாற்றங்கள் வேண்டுமென்பதை
மறுப்பதற்கில்லை! ஆனால்
மடிந்தே போவதை
மனமேற்பதற்கில்லை!

வாருங்கள் அனைவரும்!
தாய் மொழி காப்போம்!
தமிழ் மொழி காப்போம்!
தமிழன் என்ற
தன்னடையாளம் காப்போம்!
வாழ்க தமிழ்!
வளர்க தமிழ்!

வாழ்வின் நோக்கமென்ன...?

வாழ்வின் நோக்கமென்ன...?

அயராமல் உழைப்பதா?,

அழகைத் தேடுவதா?,

அறத்தைப்  பின்பற்றுவதா?,

ஆசை கொள்வதா?,

ஆசையைக் கொல்வதா?,

ஆளுமை கொள்வதா?,

ஈகை செய்வதா?,

ஈன்றவரைக் காப்பதா?,

ஈவிரக்கம் கொள்வதா?,

உடல் நலம் பேணுவதா?,

உண்டு களித்து உறங்குவதா?,

உலக நலத்திற்கு உழைப்பதா?,

ஊரார் போற்ற வாழ்வதா?,

ஊர் சுற்றிப் பார்ப்பதா ?,

ஊன் போற்றிக் காப்பதா ?,

வருமானத்தைத்  தேடுவதா?,

வயதைத் தொலைப்பதா?,

வளத்தைக் குவிப்பதா?,

சந்தோஷங் கொள்வதா?,

சங்கடந் தவிர்ப்பதா?,

சமாதானம் தேடுவதா?,

இன்னும் பல கேள்விகள்

எழுந்து கொண்டே உள்ளன..!

மண்ணில் படைக்கப் பட்ட

மனிதன் மீது

எண்ணிலடங்கா எதிர்பார்ப்புகள்!

எதை நோக்கிப்  பயணிக்கிறோம்

என்ற தெளிவில்லாமல்

எல்லாவற்றையும் எதிர்நோக்கி

அனுதினமும் பயணிக்கிறோம்..

பயணம் சிறக்க சக

பயணியின் வாழ்த்துக்கள்..!

நகரத்து சாலை

நகரத்து சாலை

எறும்புகளுக்கு இருக்கும்
இடைவெளிகூட
வண்டிகளுக்கு நடுவே இல்லை !

மயிரிழையில் உயிர் தப்பி
துயிலாமல் துரத்தோடும்
வகை வகையான வாகனங்கள்!

நடுச் சாலையில்
நிதானமாய் சாலையைக் கடப்பது
மனிதர்கள் மட்டுமல்ல
மாடுகளும் தான்!

வலம் வரும்
வாகனங்களின் வரிசை
வானத்தில் போட்டது ஓட்டை!

சுகாதாரத் சீர்கேடு
சுவாச மண்டலத்திற்கேது
சுத்தமான மூச்சு!

மனம் ஒப்பவில்லை எனினும்
மறுவழியில்லை...
மன வேதனையுடன் பயணிக்கின்றேன்
மகிழுந்தியில்...!

ஒழிப்போம் குழந்தைத் தொழிலாளர்களை.....!!

 குழந்தை வயதில் 

 குடும்பத்தைக் காக்க

 கல்வியை இழக்கும்

 குழந்தையே.....!!!

 கருத்தாய் இருந்தும்

 கல்வி இல்லாததால் 

 இரக்கமில்லா இவ்வுலகில் 

 இழக்கப் போவது நீ

 ஏராளம்....!!!

குறுகுறுப்பாய்

ஓடியாடும் 

ஒப்பற்ற வயதில்

ஒருவனுக்கு அடிமையாய்

ஓயாமல் உழைக்கும்

உன்னைப் பார்த்தால்

உதிரம் கொதிக்குதடா....!!!

உனக்கு விடிவு வர

எத்தனை விதிகள் வந்தாலும்

எழ முடியாமல் 

எப்படியேனும் 

விழுகிறாயே 

வீசப் படும் சூழ்ச்சி

வலைக்குள்....!!!

குழந்தைத் தொழிலாளர் முறை 

ஒழிப்பு தினமான இன்று

ஒன்று கூடி 

உறுதி கொள்வோம்....

குரல் கொடுப்போம் என்றும்

குழந்தைத் தொழிலாளர்களை

கூண்டோடு ஒழிப்போமென.....!!!