"தெள்ளுற்ற தமிழமுதின் சுவை கண்டார்" என பாரதியார் போற்றிய, செம்மொழியான தமிழ் அமிழ்தை விட இனிமையானது. அது "திகட்டத் திகட்ட சுவைக்கக்" கூடியது.
ஒரே பாட்டில் அல்லது தொடரில் இருவேறு பொருள்களைக் கூறுவது சிலேடை ஆகும். இரு வேறு பொருள் பொதிந்த இந்த சிலேடை பாடல்கள் படிக்கப் படிக்க நம்மை பரவசமாக்கக் கூடியது. அப்படி ஒரு பாடலைத்தான் நாம் இந்தப் பதிவில் பார்க்கப் போகிறோம்.
கம்பர் ஒருமுறை ஔவையாரிடம் ஒரு விடுகதை சொல்கிறேன், புதிரை விடுவியுங்கள் பார்க்கலாம் என்று கூறி 'ஆரை' என்னும் கீரையைக் குறிப்பதாகப் பொருளை உள்ளடக்கி கீழ்க் கண்டவாறு சொன்னார்:-
பாடல்
'ஒரு காலடி, நாலிலைப் பந்தலடி'
இதை பிரித்துப் பொருள் கொண்டால்
ஒரு கால் அடி, நால் இலைப் பந்தல் அடி
ஒரு அடி என்பது 12 அங்குலங்கள்; எனவே கால் அடி என்பது 3 அங்குலங்கள். அதாவது, “மூன்று அங்குல நீளமும், நான்கு இலைகளால் ஆன பந்தல் போன்ற அமைப்பின் கீழேயும் உள்ளது எது?” எனக் கேட்டதாகப் பொருள் கொள்ளலாம்.
இதையே, “ஒரு கால் கொண்டதடி; நான்கு இலைகளைப் பந்தல் போல் கொண்டதடி – அது என்ன?” என்றும் பொருள் கொள்ளலாம். அதாவது ஔவையாரை “வாடி, போடி” என்ற ரீதியில் மரியாதைக் குறைவாகப் பேசியதாகவும் கொள்ளலாம்.
இதில் ஒளவையார் எடுத்துக்கொண்டது இரண்டாவது பொருளை! உடனே அவர்,
எட்டேகால் லட்சணமே, எமனேறும் பரியே
மட்டில் பெரியம்மை வாகனமே, – முட்டமேற்
கூரையில்லா வீடே, குலராமன் தூதுவனே
ஆரையடா சொன்னாயது.
என்று பதில் கூறினார்.
பொருள்
அடேய் ! அவலட்சணம் பிடித்தவனே ! எருமைக் கடாவே ! கழுதையே !; குட்டி சுவரே !; குரங்கே !; நீ சொன்னது ஆரைக் கீரையைத் தானடா !
சொற்பொருள்
எட்டேகால் லட்சணமே: தமிழில் 8 என்பதன் குறியீடு “அ”; கால் என்பதன் குறியீடு “வ”. எனவே இதன் பொருள் “அவ லட்சணமே”
எமனேறும் பரியே: இங்கே பரி என்பது வாகனத்தைக் குறிக்கிறது. அதாவது எமனின் வாகனம் எருமை. எனவே இது “எருமையே” என்றாகிறது.
மட்டில் பெரியம்மை வாகனமே: பெரியம்மை என்பது ஸ்ரீதேவியின் தமக்கையான மூதேவியைக் குறிக்கிறது. அவரது வாகனம் கழுத்தை. எனவே “கழுதையே”
முட்டமேற் கூரையில்லா வீடே: தலை முட்டுமாறு மேலே கூரை இல்லாத வீடு. அதாவது “குட்டிச்சுவரே”
குலராமன் தூதுவனே: இராமபிரானுக்காக இராவணனிடம் தூது சென்றவன் ஹனுமன். அதாவது “குரங்கே”
ஆரையடா சொன்னாயது: நீ சொன்னது “ஆரைக்கீரையை” (தற்போது “அரைக்கீரை” என்று கூறப்படும் கீரை) என்றும் பொருள் கொள்ளலாம்; யாரைப்பார்த்தடா கேட்டாய் என்றும் பொருள் கொள்ளலாம். தன்னை “அடி” என விளித்ததால் “அடா” என அழைத்து பதிலடி கொடுத்திருக்கிறார்.
அதன் மற்றொரு பொருள்,
விரைந்து நடக்கும் காலழகா ! எம் குலத்தவனே ! வளரும் செல்வமே ! தேவலோகம் போன்றவனே ! உயர்குல வேந்தன் இராமபிரானின் கதையை காவியமாக்கிய கவிஞனே ! ஆரைக் கீரையை உட் பொருளாக வைத்து நீ விடுகதையைச் சொன்னாய் ! ஆனால் என்னை நீ வெல்ல முடியாது !
சொற்பொருள்:-
எட்டு + கால் = எட்டுக்கால் - எட்டேகால் ; எட்டு = கால்களை எட்டிப் போட்டு நடக்கும், லட்சணமே = அழகனே ! (விரைவாக நடக்கும் வலிமை பொருந்திய கால்களை உடைய அழகனே !) எமன் = எம்முடைவன் (எம் குலத்தவனே !); ஏறும் பரியே = வளரும் செல்வமே !, முட்ட மேல் கூரை இல்லா வீடே = தலையில் முட்டும் அளவுக்குத் தாழ்வான மேற்கூரை இல்லாத ; வீடே (அதாவது தேவலோகம் போன்றவனே !) குலராமன் = உயர்குலத்தில் பிறந்த வேந்தனான இராமபிரானின்; தூதுவனே = இராமாயணம் என்னும் இராம காதையை இயற்றி, இராமனின் புகழ் பரப்பும் தூதனே ! ஆரை = ஆரைக் கீரையை; அடா = உள்ளடக்கி, சொன்னாய் = என்னிடம் விடுகதையைச் சொன்னாய் ; அடா = அடாது.
இந்த நிகழ்வு உண்மையா பொய்யா என்பது நமக்குத் தெரியாது. ஆனால் இரண்டுமே அழகான சிலேடை பாடல்கள். கவித்துவத்தை வியந்தேன்! களிப்புடன் பகிர்ந்தேன்😊
